Bizkaia Open Future-ren bidez abiarazitako erronka teknologikoa aurkeztu du IMQ-k BIC Bizkaia Ezkerraldean

13.02.2019

IMQ Taldeak bihotz-biriketako bizkortzeko (BBB) tekniketan trebatzeko erronka teknologikoa aurkeztu die, gaur, Barakaldoko BIC Bizkaia Ezkerraldean, 25 ekintzaile, startup, enpresa txiki eta ertain eta teknologi zentro ingururi. Euskadiko osasun-sektoreko liderra eta Estatuko konpainia nagusienetako bat denak, Bizkaia Open Future (Bizkaiko Foru Aldundiaren eta Telefónica-ren ekimena), izan du euskarri, konpainiako profesionalak trebatzeko proposamenik errealistena eta efizienteena bilatzerakoan.  

Erronkarako proposamenak erakartzeko ekitaldian, IMQ-ko kliniketako ekonomia- eta finantza-zuzendari Bingen Regulezek, IMQ konpainia 84 urteko esperientziadun enpresa-talde sendo gisa deskribatu zuen. Izan ere, Euskadiko osasun-sektore pribatuko konpainia liderra da, baita Estatuko konpainia nagusienetako bat ere.

Regulezek azpimarratu zuenez, gaur egun, IMQ-k 365.000tik gora pertsonari eta 1.000tik gora enpresari ematen die osasun-estaldura Euskadin, eta, halaber, IMQ Prevención-en bitartez, 135.000 langileri eta 4.900 enpresari ematen dizkie lan-arloko osasuneko zerbitzuak. Konpainiaren fakturazioa 800 milioi eurotik gorakoa da.

Bestetik, IMQ Taldeko Kalitate eta Segurtasuneko arduradun Isabel Urrutiak, ekitaldira bertaratu zirenei erronkaren xehetasunak azaldu zizkien. Hortaz, IMQ Taldeko IMQ Zorrotzaurre Klinikak proposatutako erronkak izenburu hau du: ¿Cómo pueden las nuevas tecnologías facilitar la adquisición de la competencia en RCP? (euskaraz: Nola erraz dezakete teknologia berriek BBBeko gaitasuna eskuratzea?) Hainbat teknologiak, hala nola, errealitate birtualak, errealitate areagotuak edo Gauzen Internetak (IoT) lagun lezakete IMQren erronka konpontzen.

Izan ere, BBBeko trebakuntzaren alde praktikoan teknologia berriak aplikatzean jarri nahi du arreta erronkak, egoera simulatzeko panpinen erabileraren mugak ekiditeko –panpinak oso garestiak dira eta zentroz zentro eraman behar izaten dira–.  IMQ-k simulazio bisuala edota biomekanikoa lortu nahi du,  egoera erreala erreproduzitzeko, trebatzaileak kontuan hartzen dituen adierazleak neurtzeko. Era berean, jarduera praktikoari buruzko datuak lortu nahi ditu (maniobraren jarrera, masajearen maiztasuna, presioaren toki zehatza, …), ariketa praktikoa egiten den unean edo ondoren prestatzaileak ebalua ditzan, eta gaur egun prestakuntza-jardunbide horren bi oztopo nagusiak konpon edo hobe ditzan: jardunbidea panpinaren mende egon izana eta trebatzailea bertan egon behar izana.

Telefónica-ren Open Future plataforma orokorraren bidez abiarazitako erronka horren irabazleak, bere proiektuaren pilotu erreala egin ahal izango du, IMQ Zorrotzaurre Klinikak ordainduta, baita 15.000 euroko sari gehigarria lortu eta Bizkaiko Foru Aldundiak ematen dituen laguntzak eskuratu ere, baldintzak betetzen baditu. Bizkaia Open Future-ren IMQ erronkarako hautagaitzak aurkezteko epea, 2019ko urtarrilaren 31n hasi zen eta otsailaren 28an amaituko da.  Izena hemen eman daiteke: bizkaia.openfuture.org

Konpainiak, Euskadiko osasun-sektoreko liderra eta Estatuko konpainia nagusienetako bat denak, Bizkaiko Foru Aldundiaren eta Telefónica-ren ekimena izan du euskarri bere profesionalak trebatzeko proposamenik errealistena eta efizienteena bilatzerakoan.

BIC Bizkaia Ezkerraldeko ekitaldian, IMQ-ko profesionalek, hala nola, Zorrotzaurre Klinikako Larrialdietako arduradun Fidel Fuentesek, ZIUko arduradun Bittor Santacolomak, Bingen Regulezek eta Isabel Urrutiak, hainbat bilera izan dituzte bertaratu direnekin erronkan eta konponbideetan sakontzeko.