TD Systems Baskoniako jokalariei azterketa medikoak egin zaizkie IMQ Amárican segurtasun neurri guztiak hartuta

07.08.2020

TD Systems Baskonia taldeko saskibaloilari guztiek denboraldi-aurrearen lehen harria jarri dute IMQ Amárica zentro medikoan Edmundo Molinero sendagilearen eskutik egindako kirol-azterketa medikoen bitartez. Dusko Ivanovicen gizonek, eta taldeko kidego teknikoak, eliteko kirolariei dagozkien analisi klinikoak eta probak egin dituzte gaur, hala nola, elektrokardiograma eta ekokardiograma, esfortzu-proba eta espirometria, sasoia eta kirol-errendimendua egiaztatzeko.

Hortaz, klub gorri-urdinaren aseguratzaile mediko ofizialetik jokalari hauek igaro dira: Khadeen Karrington, Toney Jekiri, Alec Peters, Rokas Giedraitis, Youssoupha Fall, Ilimane Diop, Arturs Kurucs, Tadas Sederkerskis, Achille Polonara, Luca Vildoza, Sander Raieste, Zoran Dragic, Ondrej Hanzlik, Pape Sow eta Pavel Savkov. Eta Miguel Gonzalez Burgos eta Henry Pierria Lee-Vaughntay jokalariei 13an egingo zaizkie probak.

Proba horietarako aurrez ezarritako ordenaren arabera, odol-gazurraren alderdi biokimikoak egiaztatzeko analisi klinikoa egin ondoren, jokalariak atsedenean baloratu dira elektrokardiograma eta espirometria eginez, eta tentsio arteriala neurtu zaie. 

Hurrengo urratsa ekokardiografia bana (bihotzaren ekografia) egitea izan da. “Proba horrek aukera ematen du azterketa biribiltzeko eta miaketan, elektrokardiograman eta esfortzu-proban oharkabean pasa daitezkeen eta kirola egitean konplikazioak eragin ditzaketen kardiopatia batzuk detektatzeko”, zehaztu du IMQ-ko kardiologo María Jesús García Sánchezek.

Probak horiek ez ezik, ergometria submaxioa ere egin zaie jokalariei,  hots, esfortzu-proba, egungo Covid egoera dela eta, maskara erabiliz. IMQ Amárica zentroko kardiologo eta Baskoniaren azterketa medikoen arduradun Molinero doktoreak argitu duenez, “ergometria submaximoan, esfortzua aurrez ezarritako helburu batera mugatzen da (oro har, bihotz-maiztasuna), praktika klinikoan baliozkotu dena. Muturreko ariketa bat egin behar ez denez, maskara erabiliz egiteak ez du, printzipioz, muga garrantzitsurik ekarri behar, ezta horren emaitzari eragin ere, horrek dakarren deserosotasun logikoaz gain”. Proba horrek, hitz batez, bihotzak ariketa egitean duen erantzuna aztertzen du, jokalarien kirol-baldintzak hobetzeko eta entrenamenduak banan-banan zehazteko.

Halaber, erradiografiak ere egin dira, eskariaren arabera, eta Baskoniako zerbitzu medikoen buru Luis González Lagok lekuan bertan baloratu ditu behar bezala.

IMQ, TD Systems Baskoniaren aseguratzaile mediko ofiziala

IMQ da TD Systems Baskoniaren aseguratzaile mediko ofiziala 2007-08 denboraldiaz geroztik. Jokalari gorri-urdinei kirol-azterketa medikoa egin zaien IMQ Amárica zentro medikoak punta-puntako teknologia du kirol-medikuntzan, baita mediku espezialistak, Jarduera Fisikoaren eta Kirolaren Zientzietako profesionalak eta Errehabilitazioko profesionalak ere. Gainera,  Grupo Baskonia-Alavés taldeko 5+11 irabazi-asmorik gabeko fundazioaren kide babeslea da IMQ.