San Mamesek eta Bilbao Arenak pazientearen segurtasunerako arriskuen kudeaketari buruzko ziurtagiria berritu dute IMQ-ren eskutik

19.06.2024

Bilboko San Mames eta Bilbao Arena edo Kirol Jauregia (Miribilla izenez ezagutzen dena) kirol-esparruek Pazientearen Segurtasunari buruzko UNE 179.003 Arauaren araberako ziurtagiria berritu dute oraintsu, IMQren eskutik.

San Mames, lehenengo ziurtagiria lortu zuenean (2017an), Europako lehen estadioa izan zen segurtasun-ziurtagiri hori lortzen, IMQ-k eman ohi dion osasun-laguntzari esker. Hala, 53.000 ikusletik gorako edukiera duen estadio batean ekitaldi jendetsuak egitearekin lotutako osasun-arriskuak minimizatzeko zimenduak jarri ziren orduan.

Urtez urte, egindako kanpo-auditorien bidez, sistemaren sendotasuna agerian jarri da; izan ere, IMQ-ko eta Athletic Clubeko —egun Josu Legarreta koordinatzaile operatiboa izanda— ehun profesional ingururen inplikazioan eta esku hartzen duten estamentuen koordinazioan oinarritzen da, hobekuntza-ekimen berriak etengabe aztertzen, sustatzen eta hedatzen baitituzte.

Ikusleen segurtasun-arloan lortutakoa hain garrantsitzua denez, LaLiga-k nahiz UEFAk (Unión de Asociaciones Europeas de Fútbol, gaztelaniazko sigletan) goraipatu egin dituzte biak.

Egunotan, metodologia bera aplikatuta, Bilbao Arenaren ziurtagiria ere berritu da. Hala, 2021ean, Europako saskibaloi-pabilioi seguruena bilakatu zen. Miribillako esparruak hamar mila ikusletik gorakoentzako edukiera du, eta partida bakoitzean bi medikuk, hiru erizainek eta osasun-larrialdietako teknikari batek osatutako taldea du eskura. Pabilioiko instalazioetan, erizaindegia ez ezik, ZIU mugikordun anbulantzia bat ere badago, presako lekualdaketak azkar eta segurtasun-berme handienekin egin daitezen.

Auditoreak, Bilbao Arena auditatzeaz gain, Bilbao Basket taldearen bulegoetara bertaratu ziren, non klubeko presidente Isabel Iturberekin elkartu ziren, eta horrek partidak ikustera bertaratzen direnei osasun-segurtasun bikaineko saskibaloi-pabilioia eskaintzeko IMQrekin batera egindako lana eta koordinazio-zereginak azaldu zizkien.

Bilboko kirol-esparru biak erreferentzia dira Estatuan eta Europan, beren esparruetako osasun-arriskuen kudeaketarekin lotutako UNE 179.003 Arauaren araberako ziurtagiriak baitituzte, eta, IMQ-k Euskadiko kirol-klub biekin egindako lanari esker, arau hori lortzen lehenak izan baitira.