Aseguruen kontsumitzaileen babeserako arautegi berriari buruzko jardunaldia Gipuzkoako Bitartekarien Elkargoan

29.11.2018

• Europar arautegi berriak gardentasun handiagoa dakarkio aseguru-merkatuari, kontsumitzaileak babesteko asmoz: horientzat egokiak ez diren produktuak kontrata ez ditzaten.
• Gainera, aseguru-merkatuan esku hartzen duten operadoreen profesionaltasun- eta lehia-maila igoko du. Halaber, aseguru-erakundeetako langileek beren buruak prestatzeko beharra izango dute.

IMQ-k, Gipuzkoako Aseguru Bitartekarien Elkargoarekin batera, jardunaldi teknikoa garatu du gaur azken hauen egoitzan María José Gutierrez eta Fernando Fernández-en eskutik, IMQko Aholkularitza Juridikokoko zuzendaria eta Banka Kanaleko arduraduna, hurrenez hurren; kontsumitzaileentzat nahiz aseguru-etxe eta bitartekarientzat oso interesgarria den gai honi ekiten: aseguruen banaketari buruzko zuzentarau berria eta aseguru eta  berraseguru pribatuen banaketari buruzko geroko legea. Biek aldaketa garrantzitsuak ekarriko dizkiote sektoreko jarduerari.

Arautegi berriaren helburu nagusia aseguru-merkatuari gardentasun handiago ematea da, hain zuzen, kontsumitzaileak babesteko, horientzat egokiak ez diren produktuak kontrata ez ditzaten. Horrela, banku-sektorean MiFID II arautegiaren bidez aspalditik ezartzen ari diren printzipioak aplikatuko zaizkio aseguru-sektoreari.

Kontsumitzaileak babesteko helburu hori lortzeko, asegurua kontratatu aurretik informazio gehiago, argia eta ulergarria, eman beharko da. Aldi berean, neurriak hartu dira aseguruak beti bezeroaren onerako sal daitezen, interes-gatazkarik gerta ez dadin eta merkaturatzea aurretik zehaztutako xede-merkatuarekin bat etor dadin.

Aseguru-etxeek aldizka aztertu beharko dute aseguru bakoitza nola banatzen ari den, eta desbideratzerik dagoela antzematen bada, neurri zuzentzaileak hartu beharko dituzte. Izan ere, zuzeneko salmentak ez ezik, bitartekari-sarea ere egiaztatu beharko dute aseguru-etxeek eta, ondorioz, elkarren arteko komunikazioa eta informazio-trukea indartu, salmenta lege-betekizunen arabera egin den egiaztatzearren.

Arautegiak alderdi berri garrantzitsuak dakartza, aseguru-merkatuan esku hartzen duten operadoreen profesionaltasun- eta lehia-maila igotzeko. Esate baterako, aseguru-erakundeetako enplegatuek –orain arte Bitartekotza Legearen eremutik at zeudenak– beren buruak prestatu beharko dituzte, baita banaketaz arduratzen diren zuzendariek ere.

Halaber, IMQ-k antolaturiko jardunaldian hainbat alderdi berriri ekin zaio: erregistroak, finantza-bermeen eraentza eta arau-hauste eta zehapenen sistema.